سلام عليكم
.عشان تطلع عالسلم الاجتماعي في مصر لازم تعمل شوية حاجات كدة
مبدئيا أعرفك يعني إيه سلم إجتماعي
social ladder
السلم الاجتماعي ده هو ببساطة طبقات و شرائح المجتمع، يشبه فكرة الهرم الاجتماعي كدة
social hierarchy
الهرم ده بيبقى الطبقات الأعلى هي اللي تشغل الجزئية الأعلى من الهرم و بتقل الطبقات دي طول ما إنت نازل من الهرم
يعني أعلى طوبة في الهرم مثلا هي منزلة الرئيس و تاني طوبة الوُزَرا وهكذا لحد آخر طوبة أو الطوبة اللي في الأساس
الbase
واللي هي أقل طبقة مجتمعية في المنطقة الفلانية و اللي هي مثلا في مصر القديمة كانت طبقة الفلاحين
ففي الهرم ده كل ما تطلع طوبة كل ما ترتقي بالطبقة الإجتماعية، فلو الطوبة الأولى طبقة الفلاحين فبعدها التجار و بعدها الدكاترة و المهندسين وبعدها الكهنة(ده في مصر القديمة يعني) وهكذا.
وكذلك يكون السلم الاجتماعي.
مصطلح السلم الاجتماعي ده مشهور برة وتلاقيه كتير في الأدب الإنجليزي.
فهمت يعني إيه سلم إجتماعي؟
تعالى بقى أشرح لك الحاجات اللي أنا لاحظتها بخبرة حياتي اللي مجتمعنا إتفق عليها اللي بيها تقدر ترتقي في السلم الاجتماعي المصري ده
to climb the Egyptian social ladder
و تنويه كدة إني هابقى باتكلم بنبرة ساخرة يعني القائمة اللي تحت دي مش معناها إني راضية عنها. بالعكس!ط
1_أولا إن يبقى معاك إنجليزي حلو. وبتعرف تنطق صح
بص، لو واحد ما بيعملش حاجة في حياته مفيدة بس شاء ربنا إنه يكون بيتكلم إنجليزي حلو هتلاقي الناس بتبصله بصة إحترام و بتديله قدر تاني خالص
2-بتعرف تتكلم إيطالي و أسباني و تركي و صيني؟
ما بتعرفش تتكلم فرنساوي؟
يبقى لسة مش هتطلع الدرجة التالية دلوقتي.
الفرنساوي في مصر ليه قدسية كدابة
هي غالبا بترجع لعقدة الخواجة
بص يا ولدي، الموضوع مش موضوع لغة، لإن ببساطة لو الفكرة في اللغة فإنت معاك لغة من أصعب و أجمل إذا ما كنتش هي بالفعل أصعب وأجمل لغة في العالم، العربي.
روح بص عالأجانب اللي بيتعلموا عربي بيقولوا عليه إيه! إحنا مولودين و معانا كنز بس بنرميه عشان نتأنزح أنزحة كدابة ماسخة مالهاش طعم!
3_النقطة دي(واللي مخدوع فيها كتير أوي...أوي) هي إنك تبقى طبيب، أو مهندس أو غيرهم من "كليات القمة"!
المشكلة اللي حاصلة دلوقتي هي إن الناس ما بتدخلش الكليات دي عشان حباها و حاسة إن فعلا هي دي الكلية اللي هاتبسط و أنا فيها، إنما بيدخلوها عشان يرتقوا في السلم الإجتماعي مش أكتر.(مش كل الناس كدة.. عشان ما أكونش باعمم.. لكن كتير من الناس كدة)
الطريف بقى إن الطبقات البرجوازية الأرستقراطية ما بيبقاش همها إنها تبقى دكاترة ومهندسين لإنهم ببساطة ليسوا في حاجة لإنهم يدخلوا الكليات دي لمجرد إنهم يرتقوا في السلم الإجتماعي..لإنهم بالفعل ارتقوه من زمان! على عكس الطبقات المتوسطة بكسورها المختلفة (كل طبقة ليها كسور أي أجزاء، يعني مثلا ف الطبقة المتوسطة في منها طبقة متوسطة فقيرة و طبقة متوسطة عالية وهكذا) فبيبقى همهم الإذعان الدراسي لتحقيق ذاتهم بالإرتقاء في هذا السُلَّم اللعين.
***
أنا في رأيي إن ما هذه الموروثات الإجتماعية إلا وهم قد وجدنا عليه من قبلنا، فببساطة شديدة...إيه لازمته؟ لما ممكن نعيش مرتاحين و مبسوطين من غير التكلُّف المبالغ فيه بس عشان نرضي من حولنا بطريقة غير مباشرة فيبقى ليه ما نعملش كدة؟
إيه اللي فيها لما واحد يقول لك منشور بدل post أو مجموعة بدل group?
ليه الأم تعلم إبنها الصغير إنها إسمها "شوز" ومش جزمة؟ مالها جزمة؟ ماهي لو قلبت عليه هتقول له يا جزمة مش هتقول له "تعالى هنا يا شوز" :DD و دي قصة تانية يمكن تبقى في منشور لوحدها فكرة شَتم أو تهزيء الأطفال كدة..فهو أمر غير مقبول إطلاقا لمن لديه علم بفن تربية الأبناء. أنا في نظري اللي يبقى بيعرف يتكلم لغات كويس ومع ذلك بيتكلم وبيتعامل بالعربي، لغته، ده شخص راقي.
**
كلام جميل ولكن من منا لا يريد أنا يرتقي بنفسه في هذا السُلَّم الملعون؟
هنيئا لمن تحدى إعاقة مجتمعه وتغلب عليها ولم يعد يريد أن يحقق أهدافا نبيلةََ لمجرد إرضاء الناس ولكن لإرضاء حاجته الغريزية في النمو والإرتقاء بنية سليمة!
