ما بالاقيش حاجة أقولها

أيوة بالظبط كدة. مش باعرف أقول إيه. بقيت مش بالاقي حاجة أقولها.

،سلام عليكم الأول

أنا متأكدة إن الموضوع ده عند ناس كتير.. ما بقيناش بنعرف نتكلم و نعبر أوي في حياتنا الإجتماعية
يعني هاديك مثال، تفضل إنك تكلم حد تقول له إنه واحشك في التيليفون أو تقابله ولا إنك تكتب له عالفيسبوك مثلا ؟
اللي أنا حاساه حاصل دلوقتي إن أغلبنا بقى يفضل يعبر بالطريقة غير المياشرة: واتساب، فيسبوك و هكذا
أنا مثلا، لما بيبقى فيه تجمع عائلي باقعد كدة زي البطة البلدي ساكتة خالص و بيتاخد عني إنطباع إني إنطوائية بقى و الجو ده
رغم إني مثلا مع صحابي باكون مش كدة خالص. تعالى بقى جمع نفس العيلة على مجموعة عالواتساب مثلا، تلاقيني لبلب بربنط.
...
لحظة لحظة
مش ده كان هدفي لما كتبت الموضوع ده
الصراحة إني بقيت مش بالاقي حاجة أقولها حتى عالنت :\
حالة ميئوس منها؟
بجد. مش عارفة السبب إيه. باحاول أنخور كدة و أدور على سبب يخليني بقيت ساكتة خالص كدة و كأني مثلا في طبيعتي إني هادية.. و أنا غير كدة خالص.
يعني مثلا حد مريض؟ مش باعرف أقول له إيه غير ألف سلامة و ربنا يتم شفاك على خير و يمكن كام دعوة تكمل النقط و بس.
يعني شوف؟ دلوقتي أهوه و أنا باكتب الموضوع مش عارفة أقول إيه :D
انا إيه اللي جابني :D
يمكن من الأسباب هي إننا بقينا مش محتاجين نتكلم كتير؟
يعني تخيل نفسك قاعد عالأكل إنت و أسرتك.. في الغالب بيبقى في أي حديث بيشغل الأسرة و بيتكلموا فيه لحد ما يقوموا صح ؟
دلوقتي التيليفيزيون(منه لله) أغنانا عن الموضوع ده
بقيت العيلة قاعدين بياكلوا و عنيهم مبحلقة في التيليفيزيون ولا كأن في كلاب بلدي قاعدة بتاكل معاهم. ما بقيناش بنتكلم عالأكل و اللي هو أمر مهم جدا جدا من وجهة نظري.
خلصنا أكل. اللي كمل فرجة عالزفت التيليفيزيون كمل و اللي قعد عالموبايل بتاعه قعد و الحديث حتى بين أفراد الأسرة و بعضها بقى شبه معدوم. أنا عارفة إن مش كل الناس كدة و إن في ناس الحمد لله متمسكة بعادات كويسة و أبسطها إن وقت الأكل يبقى ليهم لوحدهم مش للتلفزيون. ناهييييك عن رمضاااان يا ولدي. مش معقول رمضان ده بجد بابقى نفسي أمسك التلفزيون أدشه في الحيطة. خخلاص بقى وقت كلامنا وقت الإعلانات بس؟
حتى الإعلانات بنبقى ساكتين
كنت باحب وقت ما النور بيقطع، كنت باحس إن العيلة كل واحد خرج من البيات الشتوي اللي عامله و خرجنا نقعد مع بعض.
تتخيل إيه؟ :D
 أيوة بالظبط اسم الله عليك.. باقة
بقى الواد يقعد لي و النور مقطوع و دافس وشه في شاشة الموبايل و قال إيه مشغل باقة. ياخي بس بقى.. بس بقى
فبقيت وقت كتير جدا جدا باقضيه لوحدي..
فبقيت باستسهل التفكير عن الكلام
يعني مثلا حد يسألني عايزة ده ليه ولا هتشتري ده ليه باكسل أشرح لهم كل اللي فكرت فيه عشان كدة عايزة أشتريه أو أيا كان
فبقيت بدوري باتلعثم في الكلام، باتهته اسم الله عليك :D
حتى لما باتعرف على صديقة جديدة ما بالاقيش حاجة أقولها
عشان كدة في الوقت الحالي ما عنديش صحاب كتير
ما كنتش كدة زمان
ما كناش كدة زمان
كنا بنتكلم أكتر
كان في حوار أكتر من كدة
كان بيننا حاجات مشتركة أكتر من كدة مش كل واحد في حاله و في دنيته اللي عالنت و خلاص
..
و على فكرة، ده من الأسباب بردو إني ما كتبتش كتير على المدونة دي.
أحيانا حاجات تيجي في بالي لكن بأحس إني هاكتفي بيها في بالي و مش هاشاركها مع حد
..
يلا كفاية كدة
سلام