Don’t judge if you don’t want to be judged

ركز معايا في البوست ده كويس عشان فيه بهاريز وخلاصة تجارب حياة مش هتسمع زيها في حتة🐸
تخيل معايا كدة السيناريو اللي ممكن يكون بيحصل معاك ومعايا ومع ناس كتير.
*بتنزل الشارع رايح مشوار أو أيا كان،
طول ما انت ماشي بتشوف ناس كتير:
-واحد شعره عامل زي عبفتاح الجريني فبتقول في نفسك إيه القرف ده مش ناوي يقصه بقى
-بتشوفي واحدة حاطة الموبايل في الطرحة فبتقولي في نفسك يلا يا بيئة يا معفنة🐸
-بتشوفي أم بتزعق لابنها الصغير فبتبصيلها بقرف وبتقولي في نفسك أم تعمل كدة؟ أسلوب زبالة في التربية
-بتشوفي واحدة لابسة بنطلون مشجر على بلوزة مقلمة (حاجة عك يعني :D ) فبتقولي في نفسك إيه العك ده*
إنت أو إنتي كدة عملت إيه؟ أطلقت أحكام على من هب ودب. فعودت نفسك اللاواعية إن اللي ماشي في الشارع أو في أي حتة لازم هيتحكم عليه أيا كان هو بيعمل إيه. فإيه النتيجة؟ هي دي:
*-بتشوف بنت جميلة فبتقول في نفسك إنك لو كنت لبست القميص التاني (أو أيا كان) كان هيبقى شكلي حلو قدامها
-بتشوفي واحد شكله ابن ناس جدا فلا إراديا بتلاقي نفسك بتظبطي طرحتك وبتعدلي حواجبك عشان تباني إنتي كمان بنت ناس.
-بَل حتى لو قاعد/ة في مواصلات وكانت البنت القمورة دي أو الواد ابن الناس راكب في العربية بردو، وحصل إن السواق بيحمرأ عليك في نص جنيه مثلا (موقف في العادي لو حصل هتبؤ مع السواق وتقول له كدة فاضل نص ورا، صح؟) مش هتنطق كلمة، صدقني. هتتكسف تنطق. لا إراديا كدة هتحس إنك لو بئيت(جاية من تبؤ) في نص جنيه شكلك هيبقى وحش أوي قدام البنت أو الولد.
-أول مرة في حياتك تجيبي نضارة شمس وأول مرة تنزلي بيها ولسة مش عارفة شكلك حلو بيها ولا لا، هتحسي إن كل الناس باصة عليكي. كل الناس حاسة شكلك يقرف والنضارة واكله نص وشك. وقيسي على كدة أي حاجة تانية، بلوزة جديدة، تقويم، شنطة، جزمة، واريفار. 🐸
الخُلاصة؟
Don’t judge if you don’t want to be judged!
ما تحكمش على حد لو مش عايز حد يحكم عليك
كتبت الجملة دي بالإنجليزي من فترة عالفيسبوك والناس عملت لي لايك، وكنت شبه متأكدة إن الناس فهمتها العكس. إن إنت لو حكمت علي أنا هاحكم عليك وأخلي يومك اسود، فلم الدور.
مع إن اللي قصدته وقتها إن لو عايز تبقى واثق من نفسك وما بيفرقش معاك كلمة الناس تقولها عليك، بطّل إنت الأول تحكم على الناس. لإن عارف ليه؟
إنت لما بتنزل بجزمة جديدة، ما حدش بيبص عليك ويقول إيه القرف ده ولا أي حاجة. عارف مين اللي بيبص عليك ويقول لك إيه القرف ده؟ إنت! نفسك! إنت اللي سستمت وبرمجت دماغك على إن أي حد في الشارع بيُطلَق عليه أحكام. فإنت أهوه، وفي الشارع، فليه ما يُطلَقش عليك أحكام؟
مش بس في الشارع بتطلق الأحكام، على النت أو في أي مكان، سواء على صور صحابك، كلام ناس عالسوشيال ميديا، نقدك لطريقة مذيع معين أو كدة. يعني لما تقرا بوست مثلا وتلاقي فيه غلطة إملائية أو حتى نحوية ويا سلام بقى لو بلغة تانية، هتحس وإنت بتقرا إنك وقفت عند الكلمة دي وقلت لنفسك تلقائيا كدة إن الكلمة دي ما بتتكتبش كدة، ما ينفعش تستخدم التركيب اللغوي ده في الجملة دي، وهكذا. لما تيجي إنت بقى تكتب بوست ولو بلغة تانية كمان أو حطيت صورة جديدة ليك أو مثلا صورت فيديو، هتلاقي إن كل التعليقات الذهنية اللي عملتها على الناس إنت تلقائيا بتفكر إن الناس هيبقى عندها نفس التعليقات عنك.
عندي فكرة لطيفة لو إنت الموضوع ده بتعمله كتير، اعمل جدول من مثلا 45 خانة أو 90 خانة وكل خانة بيوم. وامشي لمدة ال45 يوم دول من غير ما تطلق ولا حكم على أي حد. ولو لقيت تغير في ثقة بنفسك، يا ريت عرّفني. :))
ما_تحكمش_على_حد_لو_مش_عايز_حد_يحكم_عليك